Ufem Ruckweg hett uns denn d'Drake Passage nit enttüscht. So hett sie wie ihre Uebername "Drake Shake" scho sait für uns 8 bis 10 Meter hochi Welle parat gha. Das hett bedütet, dass mir eimol am morge am 3 fascht alli zum Bett us gheit sin... so öpis hän mir uf jede Fall no nie erlebt. Ziitewiis isch s'Schiff au gar nüm vorwärts gfahre, sondern numme eifach no in d'Welle inegfahre...

Well ich jo ebe seekrank wird, bini eifach 48 Stund mit der dopplete Ration an Seasicknesspille flach im Bett glege...und ha mi vo mim Ma bediene loh... Dr' Nesti isch nämlich tapfer ufgstande... obwohl mängisch isch au er zruck ins Zimmer z'seckle cho und hett sich grad no rechtzitig chönne anelege.

Im Spiissaal sins schins au immer weniger Lüt worde. Numme s'Personal hett no unermüdlich miteme Lächle serviert. Wie mache die das echt?

Wo mir endlich im Beagle Canal acho sin, sin langsam alli Lüt, au ich, wieder us dr Koje zkroche cho... und do hämir gmerkt, dass jede so sini individuelli Gschicht mit em "Drake Shake" gha hett...und ich/mir sin glaub no guet wegcho! :-)